ಗಡಿನಾಡು ಕಾಸರಗೋಡಿನ ಜನತೆ ದ.ಕ.ಜಿಲ್ಲೆಯನ್ನು ಅವಲಂಬಿಸಿದ್ದು, ದಿನ ನಿತ್ಯ ಶಾಲಾ ಕಾಲೆಜುಗಳಿಗೆ ತೆರಳುವ ಸಹಸ್ರಾರು ವಿದ್ಯಾರ್ಥಿಗಳು, ಆಸ್ಪತ್ರೆಗಳಿಗೆ, ಆರೋಗ್ಯ ತಪಾಸಣೆಗೆ ತೆರಳುವ ಸಹಸ್ರಾರು ರೋಗಿಗಳು, ನೀಟ್ ಪರೀಕ್ಷೆ ಬರೆಯುವ ವಿದ್ಯಾರ್ಥಿಗಳು ಈ ಆದೇಶದಿಂದ ತೀವ್ರ ಸಂಕಷ್ಟಕ್ಕೊಳಗಾಗುತ್ತಿದ್ದಾರೆ. ದಿನನಿತ್ಯ ಪರಸ್ಪರ ಎರಡು ಜಿಲ್ಲೆಗಳಿಗೆ ಉದ್ಯೋಗಕ್ಕಾಗಿ ತೆರಳುವವರು ಕಂಗಾಲಾಗಿದ್ದು, ಈ ರೀತಿ ರೋಗದ ಹೆಸರಿನಲ್ಲಿ ಜನರ ಸಂಚಾರ ಸ್ವಾತಂತ್ರ್ಯಕ್ಕೆ ತಡೆಯೊಡ್ಡುವುದು ಪ್ರಜಾಪ್ರಭುತ್ವ ವಿರುದ್ಧವಾಗಿದೆ. ಕರ್ನಾಟಕ ಸರಕಾರದ ಮುಖ್ಯ ಕಾರ್ಯದರ್ಶಿ ಹಾಗೂ ದ.ಕ.ಜಿಲ್ಲಾಧಿಕಾರಿ ಜಂಟಿಯಾಗಿ ಹೊರಡಿಸಿರುವ ಈ ಸುತ್ತೋಲೆಯು ಸಂಪೂರ್ಣ ಅವೈಜ್ಞಾನಿಕ, ಅಸಂವಿಧಾನಿಕ ಹಾಗೂ ಅಮಾನವೀಯವಾಗಿದ್ದು, ಕೂಡಲೇ ಇದನ್ನು ಹಿಂತೆಗೆಯುಂತೆ ಅವರು ಆಗ್ರಹಿಸಿದ್ದಾರೆ. ಗಡಿ ನಿರ್ಬಂಧ ಹೇರದಂತೆ ಇತ್ತೀಚೆಗೆ ಕರ್ನಾಟಕ ಉಚ್ಛ ನ್ಯಾಯಾಲದ ತೀರ್ಪಿಗೆ ವಿರುದ್ದವಾಗಿರುವ ಈ ಆದೇಶ ನ್ಯಾಯಾಲಯದ ಉಲ್ಲಂಘನೆಯಾಗಿದೆ, ಇದರ ವಿರುದ್ಧ ನ್ಯಾಯಯುತ ಹೋರಾಟ ನಡೆಸಲಾಗುವುದೆಂದು ಅವರು ಹೇಳಿದ್ದಾರೆ.
