ಸಮವಸ್ತ್ರ ಸಮಾನತೆಯ ಸಂಕೇತ. ಮಕ್ಕಳಲ್ಲಿ ಬಡವ ಬಲ್ಲಿದ ಮೇಲು, ಕೀಳು ಎಂಬ ತಾರತಮ್ಯವನ್ನು ಹೋಗಲಾಡಿಸುವ ಉದ್ದೇಶದಿಂದಲೇ ಶಾಲೆಗಳಲ್ಲಿ ಸಮವಸ್ತ್ರವನ್ನು ಸರಕಾರ ಜಾರಿಗೊಳಿಸಿತ್ತು. ಆದರೆ ಒಂದು ಧರ್ಮದ ಪ್ರತೀಕವಾದ ಹಿಜಾಬ್ ನ್ನು ಧರಿಸುವುದು ನಮ್ಮ ಹಕ್ಕು ಎಂದು ವಿದ್ಯಾರ್ಥಿನಿಯರು ಹೋರಾಟ ಮಾಡುವುದು ಅರ್ಥ ರಹಿತವಾಗಿದೆ. ಈ ವಿಚಾರವನ್ನು ಬಳಸಿಕೊಂಡು ಕಾಣದ ಕೈಗಳು ಮರೆಯಲ್ಲಿ ತಮ್ಮ ಬೇಳೆ ಬೇಯಿಸುತ್ತಿದೆ. ಇವರೆಲ್ಲರ ಉದ್ದೇಶ ದೇಶದ ಪ್ರಗತಿ, ಏಕತೆ ಹಿತವಲ್ಲ ಎಂಬುದು ನಮಗಿಲ್ಲಿ ವ್ಯಕ್ತವಾಗುತ್ತದೆ.
ನಮ್ಮ ಸಂವಿಧಾನದಲ್ಲಿ ಧಾರ್ಮಿಕ ಸ್ವಾತಂತ್ರ್ಯಕ್ಕೆ ಅವಕಾಶವಿದ್ದರೂ ಶಿಕ್ಷಣ ಸಂಸ್ಥೆಗಳಲ್ಲಿ ಎಲ್ಲಾ ವಿದ್ಯಾರ್ಥಿಗಳು ಸಮಾನ ಎಂಬುದನ್ನು ನೆನಪಿನಲ್ಲಿಡಬೇಕು. ವಿದ್ಯಾರ್ಥಿಗಳ ಸುಂದರ ಭವಿಷ್ಯ ರೂಪುಗೊಳ್ಳಬೇಕಾದ ಸ್ಥಳಗಳಲ್ಲಿ ಧರ್ಮದ ಜ್ವಾಲೆ ಹರಿದಾಡುವಂತಾಗಿದೆ. ಇದನ್ನ ಎಲ್ಲಾ ವಿದ್ಯಾರ್ಥಿಗಳು ಪರಮಾರ್ಶೆಮಾಡಿ ಶಿಕ್ಷಣದ ಮೂಲಕ ನೈತಿಕತೆಯ ಹಕ್ಕನ್ನು ಜೀವನದಲ್ಲಿ ರೂಢಿಸಿಕೊಳ್ಳಲು ಕಲಿಯಬೇಕು ಹೊರತು ಸಮಾನತೆಯ ಹಕ್ಕನ್ನು ಸಮವಸ್ತ್ರಗಳಿಗೆ ಸೀಮಿತವಾಗಿರಿಸಿ, "ಹಿಜಾಬ್" ಎಂಬುದನ್ನ ಬಿಟ್ಟು ಎಲ್ಲರೂ ಒಂದೇ ತಾಯಿಯ ಮಕ್ಕಳಂತೆ ಬೆಳೆದು ವಿದ್ಯೆಯನ್ನ ಕಲಿತು ನಿಮ್ಮ ಜೀವನದ ಗುರಿಯನ್ನ ತಲುಪಿ ಎಂಬುದಾಗಿ ದೇಶದ ಸರ್ವಜನತೆಯ ಮಕ್ಕಳಲ್ಲಿ ವಿನಂತಿಸುತ್ತೇನೆ. ಎಂದು ಮಂಜೇಶ್ವರ ಬ್ಲಾಕ್ ಪಂಚಾಯತ್ ಸದಸ್ಯೆ ಹಾಗೂ ಬಿಜೆಪಿ ಮಹಿಳಾಮೋರ್ಚಾ ರಾಷ್ಟ್ರೀಯ ಸಮಿತಿ ಸದಸ್ಯೆಯಾದ ಶ್ರೀಮತಿ ಅಶ್ವಿನಿ ಎಂ ಎಲ್ ಅಭಿಪ್ರಾಯಪಟ್ಟರು.
